За нас
Туѓино јабано — домот на Македонците во Канада
„Туѓино јабано“. Два збора, еден копнеж. И двата значат исто — туѓина. Едниот е наш, другиот е позајмен од далеку, како еден збор да не е доволен за сета тага на оние што заминале. Така се вика и позната македонска песна, што ја знае секој што некогаш го оставил својот дом.
Од 2004 година tugjinojabano.com е средиштето на македонската заедница во Канада на интернет. Направено е за да им помага на Македонците и на македонските иселеници — да ги поврзе и да ги држи блиску. И отсекогаш се трудело да биде спротивното на таа песна: место каде што Македонецот во Канада никогаш не е странец.
Почнавме како едноставна страница со корисни врски, што TJ-Hosting ја направи за својата заедница. Со годините прерасна во место за средба. Тука се вестите од дома, македонските цркви и медиуми, банките и превозот, и државните служби што секој новодојден ги бара во првите, најтешки месеци: здравствена картичка, број за социјално осигурување, возачка дозвола, државјанство. Денес илјадници луѓе ја отвораат секој ден.
Но Туѓино јабано никогаш не било само врски. Тоа се рецептите што ни ги испратија нашите мајки, соседи и пријатели од Мисисага, Етобико, Брамптон, Маркам и Ејџекс, потпишани со нивните имиња. Тоа е Сотир и неговиот закон, со кој и денес се смееме на самите себе. Тоа се колумните, шегите и конверторот што латиницата ја претвора во кирилица, за пораката до баба да биде напишана како што треба.
Ако штотуку пристигнавте — добредојдовте. Тука не сте сами. Некој пред вас стоел таму каде што стоите вие сега, несигурен кој формулар да го пополни и каде да најде црква за в недела, и го нашол патот. Оваа страница е неговиот подарок за вас.
Ако сте родени тука — ова е врата кон јазикот, верата, трпезата и хуморот на вашите родители, баби и дедовци.
А ако тука живеете со децении — ви благодариме. Ова место постои поради вас.
Туѓината е полесна кога сме заедно.